સુરેન્દ્રનગર LCB દ્વારા પાસા હેઠળ આરોપીની અટકાયત: પ્રોહિબિશન અને મારામારીના ગુનામાં સંડોવાયેલ ઈસમ ઝડપાયો
સુરેન્દ્રનગર લોકલ ક્રાઈમ બ્રાન્ચ (LCB) દ્વારા પ્રોહિબિશન અને મારામારીના ગુનાઓમાં સંડોવાયેલા એક આરોપીને પાસા હેઠળ અટકાયતમાં લેવામાં આવ્યો છે. રાકેશભાઈ દશરથભાઈ જાતે (ઠાકોર )આરોપીને લાજપોર, સુરતની મધ્યસ્થ જેલમાં મોકલી દેવાયો છે.રાજ્ય સરકાર દ્વારા ગુજરાત અસામાજિક પ્રવૃત્તિ અટકાવવા બાબતના અધિનિયમ-1985માં સુધારા કરીને નવા એમેન્ડમેન્ટ બહાર પાડવામાં આવ્યા છે. રાજકોટ રેન્જના પોલીસ મહાનિરીક્ષક અશોકકુમાર યાદવ (IPS) અને સુરેન્દ્રનગરના જિલ્લા મેજિસ્ટ્રેટ ડૉ. રાજેન્દ્ર એમ. પટેલ (IAS) તથા પોલીસ અધિક્ષક પ્રેમસુખ ડેલૂ (IPS) દ્વારા જિલ્લામાં અસામાજિક તત્વો સામે કડક કાર્યવાહી કરવા સૂચનાઓ અપાઈ હતી.આ સૂચનાઓનો મુખ્ય ઉદ્દેશ્ય આમ જનતાની જમીનો પર ગેરકાયદેસર કબજો, ખંડણી ઉઘરાવવા, અપહરણ, લૂંટ, મારામારી, હથિયાર ધારા, ખનીજ ખનન, દારૂ અને જુગાર જેવી ગુનાહિત પ્રવૃત્તિઓ કરતા અસામાજિક તત્વોને સખત હાથે ડામી દેવાનો છે.
